मुम्बई – शाहिद कपूर यतिबेला फिल्म ‘कवीर सिंह’ का कारण चर्चामा छन् । उनले उक्त फिल्ममा गरेको अभिनयको खुबै चर्चा भयो ।
पछिल्लो समय भने उनी तेलुगु फिल्म ‘जर्सी’ को रिमेकमा देखिँदैछन् ।
शाहिदले एक इभेन्टका क्रममा यो फिल्म हेरेर आफू ४ पटक रोएको बताएका छन् । उनले फिल्ममा आफ्नो भूमिकाले खुबै छोएको पनि बताएका छन् ।
‘फिल्म क्रिकेटमा आधारित छ, ३६ वर्षको एक व्यक्तिको ६ वर्षको छोरा हुन्छ, केही कारणले ऊ फेरि क्रिकेट ग्राउण्डमा जान्छ, किनकि उसलाई अरु केही आउँदैछ,’ शाहिदले फिल्मको कहानी खुलाए ।
उनले फिल्मको कहानीजस्तै त्यो चरित्रको कहानी देखेर आफू रोएको बताए ।
शाहिदको जीवनमा पनि कुनै समय यस्तै उतारचढाव थियो । उनले कुनै ब्लकबस्टर फिल्म दिन सकेका थिएनन्, फिल्म क्षेत्र नै छोडौं कि भन्ने उनलाई लागेको थियो ।
‘मलाई अभिनयबाहेक अरु केही आउँदैनथ्यो, तर कुनै समय अरु केही ट्राइ गरौँ भन्ने पनि लागेको थियो,’ शाहिदले भने ।
शाहिदले आफूले रिमेकमा कहिल्यै काम गर्न नचाहेको पनि बताए । किनकि, दर्शकलाई रिमेक फिल्ममा मात्र काम गरिरहेको भन्ने नपरोस् भन्ने उनी चाहन्छन् ।
