काठमाडौं– चलचित्र निर्माता तथा वितरक गोविन्द शाही धरौटीमा रिहा भएका छन् । चलचित्र ‘लिलिबिली’ को आम्दानी हिनामिना गरेको आरोपमा पक्राउ परेका शाही जिल्ला अदालत काठमाडौंमा साढे बाह्र लाख धरौटी बुझाएर छुटेका हुन् ।
महानगरीय प्रहरी वृत्त कालीमाटीले शाही धरौटीमा रिहा भएको जनाएको छ ।
शाहीलाई महानगरीय प्रहरी परिसर भक्तपुरले महानगरीय प्रहरी परिसर टेकुको अनुरोधमा भक्तपुरको राधे राधेबाट बिहीबार पक्राउ गरेको थियो । शाही भर्खरै खुलेको हलमा फिल्म हेर्न आउने सूचना पाएपछि प्रहरीले पक्राउ गरेको थियो । भक्तपुर परिसरले फिल्म हल परिसरबाटै पक्राउ गरी महानगरीय प्रहरी परिसर काठमाडौंको अनुरोधमा कालीमाटी वृत्तको जिम्मा लगाएको थियो ।
पटकपटक अदालतमा उपस्थित हुन आदेश दिए पनि शाही उपस्थित भएका थिएनन् । २ महिनाअघि पनि प्रहरीले शाहीलाई पक्राउ गरी १४ दिन थुनामा राखेको थियो ।
हिरासतमा बसेका शाही सर्वोच्च अदालतको बन्दी प्रत्यक्षीकरण आदेशमा रिहा भएका थिए ।
उनीमाथि चलचित्र ‘लिलिबिली’ को झण्डै ९० लाख रुपैयाँ हिनामिना गरेको आरोप लागेको छ । निर्माताद्वय मिलन चाम्स र सुदीप खड्काले शाहीमाथि गतवर्ष ठगीको उजुरी दर्ता गराएका थिए ।
अदालत जानुपूर्व चाम्स र खड्काले शाहीविरुद्ध चलचित्र निर्माताहरुको संघ चलचित्र निर्माता संघमा उजुरी दिएका थिए । संघका तत्कालीन उपाध्यक्ष समेत रहेका शाहीले निर्माता संघले छलफलका लागि बोलाउँदा अटेर गरेपछि उनलाई संघले पदबाट हटाएको थियो ।
निर्माता संघको सल्लाहमा निर्माताद्वय सुदीप र चाम्सले प्रहरीमा उजुरी दिएका थिए । शाहीले अदालतको आदेश पनि ‘अटेर’ गर्दै आएका छन् ।
शाहीले फिल्म ‘लिलिबिली’ बाट उल्टो आफूले रकम लिनुपर्ने दाबी गर्दै आएका छन् । यता सुदीप खड्काले भने शाहीले ९० लाख बराबर हिनामिना गरेर सम्पर्कमै आउन नखोजेको आरोप लगाएका छन् । प्रहरीले गोविन्द शाहीले श्रीमतीमाथि काफिया फिल्मस्को शेयर होल्डर पक्राउ पूर्जी जारी गरिएको छ ।
