तिहारको अवसर पारेर यही कार्तिक १५ गतेबाट प्रदर्शनमा आउने फिल्म ‘पुर्ण बहादुरको सारंगी’ को प्रचारप्रसारात्मक साङ्गीतिक कार्यक्रम इटहरी र धरानमा कार्तिक ३ गते शनिबार सम्पन्न भएको छ । कार्यक्रम कोशी प्रदेश अन्तर्गत सुनसरीको इटहरीबाट सुरु गरिएको थियो । जसमा यो फिल्मका प्रमुख कलाकारहरू विजय बराल, मुकुन भुषाल र अन्जना बराइली सहित गायक तथा संगीतकार प्रशान्त सिवाकोटी र सारंगी बाधक बिराज गन्दर्भको उपस्थिति रहेको थियो । मन्डला नाटकघरको जुनकिरी ट्रकको स्टेजमा इटहरीको संगीत चोकमा साङ्गीतिक कार्यक्रमसहित फिल्मको प्रचारप्रसार गरियो ।
प्रचारप्रसार कार्यक्रममा यो फिल्मका गायक प्रशान्त सिवाकोटीले फिल्मका गीतहरू प्रस्तुत गरे भने सारंगी बाधक बिराजले सारंगीमा र्याप प्रस्तुत गरे । यस्तै इटहरीका युवा कलाकारहरूले बुवा र छोराको भावनात्मक नाटक मञ्चन गरे भने गायक सुरेश कार्कीले आफ्नो ‘रेश्मा’ गीत गाएर उपस्थितलाई रमाइलो गराए । फिल्मका कलाकारहरूले फिल्मको ट्रेलरमा रहेका संवादहरू प्रस्तुत भने इटहरीवासीलाई फिल्म हेर्न आग्रह गर्दै कार्यक्रमलाई सेल्फी खिचेर सम्पन्न गरियो ।
यता धरानमा साँझ ७:३० बजेबाट पुर्ण बहादुरको सारंगीको प्रचारप्रसारात्मक कार्यक्रम सुरु भयो । अचानक आएको वर्षाका कारण कार्यक्रम केही समय अवरोध भए पनि वर्षा रोकिएपछि कार्यक्रम सुरु भएको थियो । कार्यक्रममा धरानका कलाकारहरूले बुवा र छोराको साहित्यिक नाटक मञ्चन गरे भने प्रशान्त र बिराजले आ–आफ्ना प्रस्तुति दिए । धरानबासीलाई फिल्मका प्रमुख कलाकार बिजय, मुकुन र अन्जनाले फिल्म हेर्न आग्रह गर्दै गीतमा नाचेर मनोरञ्जन दिलाए।
