बहुप्रतीक्षित फिल्म ‘जनै हराएको मान्छे : सम्बन्धका धागाहरू’ को पहिलो गीत सार्वजनिक भएको छ, जहाँ अभिनेता विजय बराल मुख्य भूमिकामा देखिएका छन्। ‘मसुरीको दाना’ शीर्षकको यस गीतमा प्रेम र सम्बन्धमा रहेका गहिरा भावना र द्वन्द्वलाई मार्मिक रूपमा प्रस्तुत गरिएको छ। गीतमा अञ्जु पन्त र एसडी योगीको सुमधुर स्वर रहेको छ, भने हर्क साउदको शब्द रचना र संगीत एसडी योगीले तयार पारेका छन्।
सुनिल क्षेत्रीको कोरियोग्राफीमा बनेको गीतको भिडियोमा विजय बरालसँगै केकी अधिकारी, मिरुना मगर र गौरव पहाडी लगायतका कलाकारहरूको जीवन्त अभिनय देख्न सकिन्छ। भिडियोमा प्रेमी–प्रेमिकाबीचको मनोदशा, उनीहरू भोगिरहेका अन्तरद्वन्द्व र जीवनका संघर्षहरूलाई यथार्थपरक रूपमा उतारिएको छ। विशेषतः प्रेमिकाको दृष्टिकोणमार्फत तयार गरिएको गीतमा प्रेमका सपना र वास्तविकताबीचको टकरावलाई सरल, तर गहिरो भावनात्मक शैलीमा प्रस्तुत गरिएको छ।
गीतमा समेटिएका दृश्यहरू — प्रेमीको झल्कोले मुटु द्रवित बनाउने क्षणदेखि सँगै जीवन बिताउने चाहनासम्म दर्शकको मन छुने छ । विशेषगरी विजय बरालको नृत्य प्रदर्शन प्रशंसनीय छ, जसले गीतलाई थप प्रभावशाली बनाएको छ।
भानुभक्त ढकालद्वारा लेखिएको कथा, पटकथा र संवादमा आधारित यो फिल्म पेपरक्लिप ब्यानर अन्तर्गत कमल न्यौपाने र विमल न्यौपानेले निर्माण गरेका हुन्। फिल्ममा मनिष राउत सह–निर्देशकको रूपमा छन् भने कार्यकारी निर्माता नारायण तिम्सिना, चुडामणि सिवाकोटी, आरके मानन्धर, सिआर बस्नेत, फिलिप डिसी र जेम्स महाराजन रहेका छन्।
