काठमाडौं – अभिनेता दीपकराज गिरीले गाँजालाई नेपालमा खुला रुपमा बेच्न पाउनुपर्ने धारणा राखेका छन् । एक अन्तर्वार्ताका क्रममा उनले दिएको यस्तो अभिव्यक्तिले गिरी विवादमा समेत तानिएका छन् ।
अन्तर्वार्ताकार प्रकाश सुवेदीले गिरीलाई सोधेका थिए – तर तपाईंलाई नि गाँजाप्रेमी भन्छन् नि हो?
साथै उनले अन्तर्वार्ताका क्रममा गाँजालाई वैध बनाउनुपर्ने धारणा राखे । ‘गाँजा त लिगलाइज गर्नैपर्छ, तर म के भन्छु भने लागुऔषधका रुपमा लिनुहुन्न,’ उनले भने, ‘आत्म नियन्त्रण छैन भने गाँजा नखानुस्, यसलाई असाध्यै व्यवस्थित गरेर खानुभयो भने एकोहोरो र डेटिकेटेड बनाइदिन्छ ।’
गिरीले आफूमा देखिएका कतिपय रोग पनि गाँजाले निको बनाएको बताए । साथै उनले गाँजा चुरोट तथा मदिराभन्दा राम्रो भएको पनि धारणा राखे । ‘म त भन्छु चुरोट पनि हानीकारकै हो,तर यहाँ बेचिन्छ नि, बरु नशाका रोगीहरुलाई गाँजा खाऊ नै भन्छन्,’ उनको भनाइ थियो ।
उनले आफूले दिउँसो कामको बेलामा कहिल्यै गाँजा सेवन नगरेको र सधै आत्म नियन्त्रणका साथ क्रियटिभ काममा लागेको भन्दै गाँजाको प्रचार गरे ।
‘म गाँजाको प्रमोटर होइन, खाए खानुस्, नखाए नखानुस् । एउटा ‘स्टिक’मा ह्याप्पी हुनुहुन्छ भने खानुस्, संसारका विभिन्न शहरमा गाँजा फ्री बनाइसक्यो, यसको फाइदा छ,’ उनले दाबी गरे ।
‘गाँजा खाएर मान्छे कुटेको सुन्नुभएको छ? गाँजाले उच्छृङ्खलतालाई कम पनि गरिदिन्छ, तर गाँजाको पनि एडिक्सन हुने डर भने छ है,’ उनको आशय थियो ।
यता गिरीले गाँजा खाने गरेको स्वीकार गरेपछि फ्यानले गालीसमेत गरेका छन् । कतिपयले भने उनको अभिव्यक्तिको समर्थन गरेका छन् ।
‘म त गाँजा खान्न तर दीपक जीको कुरा पनि सही हो,’ एक प्रयोगकर्ताले लेखेका छन् । अर्का प्रयोगकर्ताले लेखेका छन्, ‘दीपक जी झ्यापमा नै हुनुहुन्छ जस्तो छ ।’
‘राजा झ्यापमा छ कि क्या हो आज,’ एक प्रयोगकर्ताले लेखेका छन् । अर्काको कमेन्ट छ, ‘दीपकको नौटंकी हेर न गाँजा खाने गँजेडी पो रहेछन् ।’
त्यसो त नेपालमा गाँजा बन्देज गर्नुहुन्न भन्ने आवाज लामो समयदेखि उठेको छ । धेरै प्रयोगकर्ताले भने गाँजालाई खुला बिक्री गर्न पाउनुपर्ने भन्दै गिरीसँग सहमति जनाएका छन् ।
