काठमाडौं – पूर्व मिस नेपाल उषा खड्गी र सञ्चारकर्मी जीपी तिमल्सेनाको वैवाहिक जीवनमा खटपट देखिएको छ । केही समयदेखि यी दुईको वैवाहिक जीवनमा खटपट परेपछि दुवै डिभोर्सको स्थितिमा पुगेको हल्ला चलेको छ । यद्यपि यसबारेमा यो जोडी भने बोल्न चाहेको छैन ।

सामान्य घर झगडा बढेको दुवैले स्वीकारे पनि डिभोर्स गर्ने भने चर्चा हल्ला मात्र भएको जीपी बताउँछन् । यद्यपि यी दुई छुट्टिने अवस्थामा पुगेको स्रोतको दाबी छ । सामाजिक सञ्जालमा पनि उषाले आफ्ना छोराछोरीका तस्वीर मात्र अपलोड गर्ने गर्छिन् ।

यता जीपीले पनि सामाजिक सञ्जालमा उषा खड्गीसँगका तस्वीर शेयर गरेको पाइँदैन । साथै उनले आफू यस विषयमा बोल्नै नचाहेको पनि बताएका छन् । ‘बाहिर जे हल्ला चलिरहेको छ, यो बारेमा मलाई केही नसोध्नुहोला, मलाई कुनै चासो छैन,’ जीपीको भनाइ छ ।

अर्कातिर दुई वर्षअघि निर्माण हुने भनिएको चलचित्र ‘आउँदै जाँदै’ पनि अझैसम्म बन्न सकेको छैन । तामझामका साथ फिल्म निर्माणको आधिकारिक घोषणा गरिएको यो फिल्म अब भने झनै नबन्ने हो कि भन्ने अड्कल काट्न थालिएको छ ।

सन् २००० कि मिस नेपाल उषा खड्गी र जीपीले अन्तर्जातीय विवाह गरेका थिए । जीपी र उषाको डेढ दशक लामो वैवाहिक सम्बन्ध टुट्ने हो कि भन्नेमा धेरैले चिन्ता व्यक्त गरेका छन् ।

तपाईको प्रतिक्रिया