कोरोना कहर

-राजेन्द्र पोखरेल

वनको बाघले भेट्नु पहिले
मनको बाघले खाला कि त?
रणभूमि छाड्दै सिपाहीहरु
गुफातिर जालान् कि त?

छाक टार्न परदेशिएकालाई
घरको ढोका खुल्ला कि त?
मातृभूमिको तिलक लाएर
बरु प्राण त्याग्लान् कि त?

गिद्धे दृष्टि लिएका मनहरु
कर्तव्यबाट चुक्छन् कि त?
धमिलो पानीका माझीहरु
भेलसँगै बग्लान् कि त?

घुम्ने मेचका अन्धा मान्छे
कोरोना कहर बुझ्लान् कि त?
भयबाट मुक्ति पाउने
दिन नजिक होला कि त?