काठमाडौं – फिल्म ‘यात्रा’ मा दृष्टिविहीनको भूमिका निभाएपछि मलिका महतलाई कतिपय दर्शकले दृष्टिविहीन भएको समेत अड्कल काटे ।
फिल्मले उनलाई खासै सफलता नदिलाए पनि फिल्म क्षेत्रमा चिनायो । त्यसपछि उनलाई विभिन्न फिल्मबाट अफर आइरहे । पछिल्लो समय भने उनी म्युजिक भिडियोका कारण चर्चामा छिन् ।
‘फूलबुट्टे सारी’ बोलको म्युजिक भिडियोमा मोडल तथा कलाकार पल शाहसँग देखिएकी मलिकालाई दर्शकले रुचाएका छन् । मिलन नेवारले स्वर दिएको यो गीतको भिडियो छोटो समयमै अत्यधिक हेरिएको भिडियो बन्न सफल भएको छ ।
गायक मार्मिक लामाले स्वर दिएको ओर्जिनल गीत ‘फूलबुट्टे सारी’ भन्दा यो गीत अझ बढी हेरिएको छ ।
म्युजिक भिडियोमा मलिकाको अभिनय पनि उत्तिकै रुचाइएको छ । भिडियोमा उनले लजालु युवतीको भूमिका निभाएकी छिन् । यही म्युजिक भिडियोले उनलाई फिल्म ‘यात्रा’ ले नचिनाएका दर्शकमाझ पनि चर्चा दिएको छ ।
पछिल्लो समय उनलाई म्युजिक भिडियोबाट पनि उत्तिकै अफर आइरहेको छ । यो गीत हिट भएपछि म्युजिक भिडियोबाट धेरै नै अफर आएको मलिका बताउँछिन् ।
आफूलाई गीत मन परेन भने म्युजिक भिडियोमा अभिनय नगर्ने पनि उनी बताउँछिन् । म्युजिक भिडियोबाट अफर आए पनि फिल्मबाट भने अफर नआएको उनी सुनाउँछिन् ।
मलिकाको डेब्यु फिल्म ‘यात्रा’ मा उनको जोडी सलिनमान बनियाँसँग थियो । यो फिल्मबाट उनले औसत चर्चा बटुलेकी थिइन् ।
