एभरेष्टका विद्यार्थी बाजागाजासहित रोपाईमा

विराटनगर । राष्ट्रिय धान दिवसको अवसरमा विराटनगर– ५ स्थित एभरेष्ट स्कुलका विद्यार्थीले पञ्चेबाजासहित धान रोपाईं गरेका छन् । झोराहाट नाट्य समूहको संयोजनमा विद्यालयका कक्षा १ र कक्षा १० का विद्यार्थीहरुले रोपाई गरेका हुन् । विद्यालयका प्राचार्य, सह–प्राचार्यसहित खेतमा पुगेका विद्यार्थीहरुले हिलो छ्यापाछ्याप गर्दै रोपाई गरेका हुन् । करिब तीन सय विद्यार्थीले धान दिवसको अवसरमा रोपाई गरि दहि च्यूरा खाएर फर्किएका छन् । नेपाल कृषिप्रधान देश भएपनि शहरमा बस्ने पछिल्लो पुस्ताले कृषि पेशाका बिषयमा जानुन भन्ने उद्देश्यले रोपाई कार्यक्रमको आयोजना गरिएको विद्यालयका प्राचार्य टिकाराम पुरीले बताउनुभयो । उहाँले कृषकहरुको सम्मानका निम्ति हरेक नागरिकले कृषि पेशालाई बुझ्न आवश्यक रहेको तर्क गर्दै व्यवहारिक ज्ञान दिलाउन रोपाई गरिएको बताउनुभयो । झोराहाट नाट्य समूहका सञ्चालक तथा नाट्यकार भरत गुरागाई (बरबरिक) ले गुणस्तरीय शिक्षा प्रदान गर्दै आएको एभरेष्ट स्कुलले व्यवहारिक शिक्षामा दिएको जोडको प्रशंशा गर्नुभयो । कार्यक्रममा सहभागि विद्यार्थीहरुले रोपाईंका बिषयमा जानकारी पाएको मात्र नभई निकै रमाइलो अनुभूति भएको प्रतिकृया दिएका छन् ।