काठमाण्डू । इरानले दुई वटा अमेरिकी युद्धविमान नष्ट गरेको छ । यस घटनामा एक चालकको उद्धार गरिएको छ भने अर्का चालक अझै हराइरहेको अमेरिकी टेलिभिजन संस्था सिएनएनले जनाएको छ । पहिलो विमान इरानभित्र नष्ट भएको थियो । उद्धार गरिएको चालकको जीवन सुरक्षित छ तर हराइरहेको अर्को चालकको खोजीका लागि अमेरिकी सेनाले व्यापक उद्धार अभियान सुरु गरेको छ ।
विवरण अनुसार इरानी सुरक्षा बलले फारसको खाडीमा अर्को अमेरिकी युद्धविमानलाई प्रहार गरेको छ र त्यो विमान पनि दुर्घटनाग्रस्त भएको बताइएको छ । यी घटनाका कारण पश्चिम एसियामा तनाव थप बढेको छ । इरानले क्षेत्रका विभिन्न लक्ष्यमा प्रहार जारी राखेको छ, जसले इजरायल र खाडीका छिमेकी देशमा दबाब कायम राखेको छ । अमेरिकी रक्षा मन्त्रालय पेन्टागनले सार्वजनिक गरेको पछिल्लो विवरण अनुसार यस युद्धमा ३६५ अमेरिकी सैनिक घाइते भएका छन् । त्यसै गरी ६३ जना नौसेनाका, १९ जना समुद्री सुरक्षा बलका र ३६ जना वायुसेनाका सदस्य घाइते भएका छन्, जसले युद्ध विभिन्न सैन्य क्षेत्रमा फैलिएको देखाउँछ ।
त्यसै गरी युद्धमा मृत्यु हुने अमेरिकी सैनिकको सङ्ख्या १३ पुगेको छ । तीमध्ये सात जना प्रत्यक्ष शत्रुतापूर्ण कारबाहीका क्रममा मारिएका हुन्, जुन युद्धको अग्रपङ्क्तिमा भएको भिडन्तको परिणाम मानिन्छ । साथै इरानले कुवेतमा गरेको आक्रमणमा छ जना सैनिकको ज्यान गएको छ । अर्को एक सैनिक साउदी अरेबियामा घाइते भएपछि मृत्यु भएको जानकारी पनि दिइएको छ ।
अमेरिकी सेना प्रमुखको राजीनामा
इरान युद्ध जारी रहँदा अमेरिकाका स्थल सेना प्रमुख जनरल जर्ज ¥यान्डीले राजीनामा दिनुभएको छ । यो राजीनामा स्वेच्छाले नभएर ट्रम्प प्रशासनले सिर्जना गरेको दबाबपछि आएको अमेरिकी सैन्य अधिकारीले सिएनएनसँग बताएका छन् । एक सुरक्षा अधिकारीले बताए अनुसार जनरल जर्जसँगै अन्य दुई वरिष्ठ सैनिक अधिकारीले पनि राजीनामा दिएका छन् ।
इरानमा दुई जनालाई मृत्युदण्ड
इरानले शनिबार प्रतिबन्धित विपक्षी समूहमा सदस्यता र इस्लामिक गणराज्यलाई ढाल्ने लक्ष्य राखेका कार्यमा संलग्न रहेको आरोपमा दुई व्यक्तिलाई मृत्युदण्ड दिइएको न्यायपालिकाले जनाएको छ । मृत्युदण्ड पाउनेमा अबोलहसन मोन्टाजेर र वहिद बानियामेरियन रहेका छन् । न्यायपालिकाको वेबसाइट मिजान अनलाइनका अनुसार दुवैलाई अदालतको निर्णयपछि मृत्युदण्ड दिइएको हो । गोरखापत्र अनलाइन
