सञ्जय मिश्रा
रौतहट २३ बैशाख। रौतहटको चर्चित बजार कटहरियामा सार्वजनिक शौचालयको व्यवस्थापन नहुँदा सैयौं मानिसलाई सास्ती भोग्नु परेको छ।
बजारको दक्षिणतर्फ अव्यवस्थित सार्वजनिक शौचालयबाट बजारका ब्यापारी तथा किनमेल गर्न आउने मानिसको जेनतेन काम चले पनि बजारको उतरतर्फ कठिनाई भएको हो।
बजारको उतरतर्फ नेपाल बैंक लिमिटेड, प्रहरी थाना छेउ सुनार चौकमा सार्वजनिक शौचालय नहुँदा स्थानिय ब्यापारीसँगै प्रहरी कार्यालय र बैंकमा आउने सेवाग्राहीलाई ठूलो शास्ती भोग्नु परेको छ।
सुनार चौकमा बैंक, प्रहरी थाना, झण्डै एकदर्जन सुनचाँदीपसल संगै अन्य गरी दुई दर्जन पसल सञ्चालनमा रहेको छ । बजार क्षेत्रको अधिकांस पसलहरुमा शौचालय सुबिधा उपलब्ध छैन।
हप्ताको दुईपटक आईतवार बुधवार लाग्ने हाट बजारमा प्रहरी, बैंकसँग सम्बन्धित सेवाग्राहीका साथै सैयौं महिला पुरुष किनमेल गर्न आउने गर्दछन्।
सो समयमा दिशा पिसाब लागेमा पुरुष सेवाग्राही अथवा पसलेहरु झण्डै ७०० मीटर टाढा सौच गर्न जानुपर्ने बाध्यता रहेको सुन चाँदी ब्यवसायी निरज ईन्टप्राईजेजका सञ्चालक जयमंगल साहले बताएका छन्।
जारको भीडमा ग्राहककै भरमा पसल छोडेर शौंच गर्न जानुपर्दा पसलको सामान हिनामिना हुने जोखिम रहेको ब्यापारी साहले न्युज कारखानासँग गुनासो गरेका छन्।
त्यसैगरी महिला सेवाग्राहीहरु सौच गर्न कसैको पारिवारिक घरमा अथवा बाँसघारी झ्याङमा जानुपर्ने बाध्यता रहेको अर्का ब्यापारी राधेश्याम साहले बताएका छन्।
सुनार चौकमै बाटो छेउमा रहेको १० लाख रुपैयाँ भन्दा बढी मूल्याङ्कनको करीब दुईधुर एलानी जग्गामा ब्यक्तिले धारा ( ट्युवेल) जडान गरी लामो समय देखि भोगचलन गर्दै आएका छन्।
तर, कटहरिया नगरपालिकामा एकजना मेयर सियाराम कुशवाहाको कार्यकाल पूरा भएको तथा बर्तमान मेयर अजय प्रकाश जैसवालको कार्यकालको तेस्रो बर्ष बिति रहँदा बजारको उतरीचौकमा सार्वजनिक शौचालय बनाउनतर्फ ध्यान भएको छैन।
त्यसैगरी, कटहरीया- ५ बजारका वडा अध्यक्ष सर्फलाल गुप्ताको यो दोस्रो कार्यकाल चलिरहेको छ। नेपाली काँग्रेस क्षेत्र- ३ का सभापती समेत रहेका वडा अध्यक्ष गुप्ता बार्षिक वडाको सिलिङसँगै मधेश प्रदेश सरकारबाट करोडौँको योजना ल्याएर बढी नाफा हुने जनसरोकार नभएको स्थानमा काम गर्ने गरेका छन्।
तर, सैयौं मानिसको प्रत्यक्ष समस्या रहेको सार्वजनिक शौचालय निर्माण तथा भएको शौचालय व्यवस्थापन तर्फ वडा अध्यक्ष गुप्ताको कहिलै ध्यान नगएको वडाबासिले गुनासो गरेका छन्।
मेयर अजयप्रकाश जैसवालले उक्त स्थानमा सार्वजनिक शौचालय निर्माण गर्न योजना स्वीकृत भईसकेको बताउँदै यसै आर्थिक वर्षभित्र निर्माण हुने प्रतिबद्धता जनाए ।
